منثورات شعبيه من مجالسنا الشعبيه

[صدى السنيين]

مساااااااء وصبااااح الحب للجميع
والله وأنا أفرفر بهالمنتديات
طحت على كنز
" بنظري إنه ثمييييييين بالحيل"
بعض القصص الشعبيه
وما دار فيها من أشعار ومنثورات راااااااائعه
http://www.arb-up.com/files/arb-up-2008-6/12r14582.jpg (http://www.arb-up.com/)
<<< بصراحه أنا أحب هالرائحة الأصيله النابعه من الصحراء
<<< مع إني بنت مدن وعمري ماطلعت للصحراء ولا حتى للكشته
كنت أستمتع كثير لسواليف " الوالد رحمة الله عليه "
وقصص مغامراته وحياته زمان
وأستمتع اللحين بسواليف ست الحبايب
عن الأرض والبلاد والزراعه والفلاحه<< وأستعذب أنفاس الماضي
التي تزفرها" الله يعطيها الصحه" شوقاّ لذالك الزمن البعيد
وبعد مامريت بهالشعبيات
فكرت أطرحها هنا بهالمنتدى الغالي على قلبي
وتكون على شكل سلسلة من التراث
وأتمنى اللي عنده قصص من التراث لا يبخل فيها علينا هنا
بس بشرط أبيها باللهجه البدويه اي الأصيله
هههههه >>> قولو أتقنيها إنت بالأول:p
وراح أبدأ بأول هالقصص

[صدى السنيين]

السلام عليكم ورحمة الله تعالى وبركاته

هذي قصة القهوه

في الزمن السابق كانت الحياه صعبه، واساسيات العيش غير متوافره ،
من ذلك كانت القهوه نادره..ولقلتها تجد ان بين العرب رجلا او رجلين على الاكثر
يحرص على عمل القهوه في وقتها
حيث يجتمع عند جماعته عنده جماعته. ومن هؤلاء الرجال
، كان (رشيد بن مقلقل العرادي)من قبيله بلى ،
وقد عرف بالكرم وحرصه على القهوه وفي شبابه وهبه الله قوه جسديه هائله ،
ولعل هذه الحادثه تبين لنا مدى قوته. حيث اغار قوم على ابله واخذوها ،
ولم يكن عنده فرس،فاضطر ان يلحق بهم سيرا على الاقدام ، وكان يتبع اثارهم ، فلما حل الليل وتوقفوا للراحه ،
كمن قريبا منهم حتى حانت الفرصه فتسلل الى عقيد القوم واسمه (حمد)
فأطبق يديه على فمه وحمله على ظهرهوعاد به! فلما افاق الغزاة صباحا افتقدوا زعيمهم واكتشفوا الاثر
وعلما بما جرى. فارسلوا يطالبون باطلاق زعيمهم فقال لهم رشيد: هو عندنا على الرحب والسعه،
ولن يعود لكم الا اذا اعدتم الابل . فرضخوا اللامر وتم ه ما اراد. وقد ذكر ذلك شاعر
مـــن قــــبــــيــــلــــه بلـــــــــــــي فـي بـيـتـيـن مــــن الـشـعـر:
يـا رشيد يا شوق البـني الرعـابيب00شـوق الهنوف اللـي تـجـلـى عذابه
خـطف حـمد واقـفى كـمـا يقفي الذيب00يـا ليـتنا حـضـار يـوم الـتـوى بـه
وبعد ان بلغ -رشيد بن مقلقل- سن المشيب ,
حمل ابناؤه اعباء تصريف الامور, واصبح المال
في حيازتهم, حيث ينزلون الي(الديره)لشراء حاجاتهم,
ويجتهدون خصوصا في شراء القهوه
الي والدهم الذي يشدد في وصاته عليهــــــــــــــــــــــــــــا.
وفي احد الايلم كانت كميه القهوه التي اشتراها الولد قليله
فلم يرض الوالد الذي تمتم قائلآ
(ليه ماكثرت القهوه والهيل)
وربما لم يسمع الولد او لم يفهم ماقاله والده فقال لامه
ماذا يقول الوالد؟ فقالت الام- بلهجتها :
( اتركةعنك هذا شايب قلبه مريحاني)
فاستاء رشيد من هذه الكلمه وتذكر شبابه
وقد لاحظ الابن ذلك عليه وعرف ان والده تاثر من
الكلمه لذلك لم ينم ليلته,
بل تظاهر بالنوم وهو يراقب والده , اما الوالد فعندما ظن ان الجميع
ناموا تمثل بهـــــــــــــــــذه الابــــــــــبيــــــــــــــــــــــات:
ياللي بقولك شايب مريحاني00الله مــــــــا بالقلب عقدات ولوو
يـاذيب وان خليت عليك المكاني00ولـجـلج عليك الجوع ياذيب قم عو
ولايعوي الابـارد الـزند وانــي00او مـن عـياله من هوى باله انحو
هـاتـوا لنـا بـن وباقي المعـاني00يـعبـا لاهـل شـيـب الغوارب اذا جـو
حتـى يـجـي لونه اذا صب قاني00بـرونـقوالاريـق طـيـر تـرى هو
صــبه وبـد:ابـها طوال الـيـمـانـي00حـتى تـشـوف ان المضاريم يحيو
واقـصـر عن اللي مايعرف المعاني00حـتـيـش لو راحواوحتيش لو جو
لما سمع الابن قصيده والده نهض في لحظته
وركب ذلوله وسرى ليلآ ليشتري مايريد والده
من القهوه والهيل واكثر منها.

إلى اللقاء في قصه جديده
<<< والله تذكرت
المذيع اللي كان يجي ببرنامج والله ناسيه اسمه
وكان اسمه مقحص بن شلاح على ما اتوقع

[عبدالعزيز بن سعد السراء]

اللي ماله اول شئ اكيد ماله ثاني

لي عودة ان شاء الله

عبد العزيز بن سعد السراء

[صدى السنيين]

مرحباً هيل
عد وابل السيل
مرحباً عد مابرق الرعد وماهل القطر
حياالله أبو عبدالله إقلط تقهو
http://www.2kraz.com/up/get-3-2009-16wn84r1.gif (http://www.2kraz.com/up)
وهذي القصيده ترحيب فيك
حياك ياقالط بالمجلس ومسلم على المجاليس
حياك يللي مفرحنا مرورك ونورنا حضورك
حياك ومرحباوالله فيك بين المجاليس
زارنا السعد والهنا وزاد نور مجلسنا بنورك

[صدى السنيين]

هذي الله يسلمكم قصة شاعر وفارس يقاله له بداح العنقري
كان من امراء ثرمداء ... وكان رجل تاجر ... وكانوا يجونه البدو كل سنه
يشترون منه بالدين اغراضهم وحوائجهم وكان رجل آمين وخلوق وكريم
وصاحب مروه وشهامه ... وكان يديّن اللي يشترون منه الي السنه اللي بعدها
يجون يشترون منه ويعطونه فلوسه الاوله ....
وبأحد السنين جاه احد خوياه يشتري منه وكانت معه بنته مزيونه ....
المهم ان بداح رحب بهم واكرمهم واشتروا منه ورجعوا لديارهم بالباديه ....
فقرر بداح ان يتزوج بنت صاحبه ...
وفعلن عقب مامشوا منه وبعد كم يوم من مشيهم ..
ويوم هقا انهم وصلو ديارهم شد على فرسه ولحقهم ...
ايام وليالي الاوالله الا هو واصلن عندهم ....
فرح خويه بالحيل وهلا به واكرمه ...
وثاني يوم قال بداح لخويه انا جايك طالب ايد بنتك هيا ...
فقال ابرك الساعات وارخص لي اخذ راي البنت ...
فراح الابو ونشد بنته وبداح يسمع حيث ان صوتهم كان مسموع ..
وقالها يابنتي بداح العنقري جاي يطلبك حليلتن له وش تقولين ؟؟
قالت البنت : هذا حضري .. خيال تصفيح مايصلح لي ولا أصلح له
.... سمع بداح كلام البنت ... فجاء الابو مستحي وماتكلم ..
قاله بداح ماله داعي الحيا والزواج قسمه ونصيب ..
مير انت بيض الله وجهك وارخص لي هالليله
ابي انام والصبح ابي امشي لاهلي ...
المهم جاء الليل وعجز لا ينام بداح من القهر من اللي سمعه
ان البنت ماتشوفه شي وانه ماهو شجاع ولا به خير ..
فتمنى بس لو يجي موقف يقدر يثبت به وجوده ........
المهم يوم اصبح الصبح مع الفجر ..
صاح الصايح .... الغزو الغزو .... اثاري قبيلة ,,,,,,,
غازين وماخذين حلالهم .. فتفازعت القوم والحقوا الفضول
وبداح قاعد يتقهوى ماتحرك ابد (( لان الضيف مايلزمه شي ))
فجته البنت هيا اللي كان يبيها تناظر له باحتقار وتقول:
حضري خيال نظره ..... حضري خيال نظره ....
تعني انه بس مظهر ومحتقرته لانه مافزع مع القوم ...........
المهم وهم يلحقون الفضول واتشابك السيوف ويعجزون اهل الحلال
لا يفكون حلالهم وهم يرجعون حول الضحى منكسرين
وخايبين ولا ردوا شي ....
وبهكاللحظات والناس والحريم كلها طالعه
تناظر الحال فقام بداح يوم شاف ان معازيبه انكسروا
وقدام الكل والبنت تشوفه وركب فرسه وخذا رمحه وطنب يم ,,,,,
يبي يرد الحلال لحاله ..... الناس استغربت والبنت اندهشت ...
وهو يلحق ,,,,,, وادخل بينهم واذبح واذبح والبخيت اللي نجا ..
وهو يرجع بالحلال حروة العصر لحاله ... وكانت الناس تستقبله كلها
.... واول ما اقبل يم الديره ومعه الحلال اركضت عليه هيا وقامت تهلهل
مثل انه تعتذر منه وقابله الزواج به .... فركز رمحه عندها وقال :
الله أحـد يامـا غزيـنـا وجيـنـا
وياما ركبنـا حاميـات المشاويـح
ويامـا علـى اكوارهـن اعتليـنـا
وياما ركبناهن عصيـرن مراويـح
ويامـا تعاطـت بالهنـادي يديـنـا
وياما كسبنا من حـلال المصاليـح
وراك تزهـد يريـش العيـن فينـا
تقول خيال الحضر زين تصفيح
الطيـب ماهـو بـس للضاعنيـنـا
قسّم علـى كـل الوجيـه المفاليـح
البـدو واللـي بالحضـر نازلينـا
كلن عطـاه الله مـن هبـت الريـح
يوم انجمر رمحي خذيـت السنينـا
واودعت عنك الخيل صم(ن) مدابيح
هيا عطينـا الحـق .. هيـا عطينـا
وان ماعطيتيـنـاه والله لا صـيـح
لاصيح صيحت من غدالـه جنينـا
والا خلوجـن ضيعـوه السواريـح
ياعـود ريحانـن بعـرض البطينـا
ومنين ماهب الهوا فـاح لـه ريـح
يابو نهيد(ن) تقل فنجان صينا
والا كما بيضن للمشقا ذوابيح
لاخـوخ لا رمـان لاطلع تينـا
ولا مشمش البصرة ولا هن تفافيـح
ويقولون عقب القصيده مشى وخلاها ماتزوجها
فقامت هيا من زود القهر وحطت الرمح بصدرها وماتت قهر
انها عييت عليه وهو عيا عليها


أتمنى تعجبكم القصه والقصيده

[د. سعود بن صالح المصيبيح]

شكرا لروعة أختيار صدى السنين بس أحس القصه ملفقه . ركزت هيا الرمح بصدرها وماتت . فيلم هندي

[صدى السنيين]

شكرا لروعة أختيار صدى السنين بس أحس القصه ملفقه . ركزت هيا الرمح بصدرها وماتت . فيلم هندي
ههههههههههههههههه
والله يا أبو صالح
أنا أتوقع كل القصص البدويه السابقه كانت أفلام هنديه بس في الباديه
شي غريب في أمورهم وسوالفهم:confused::)

بعدين تعال دكتور:mad:
وش فيها لا تفرجنا فلم هندي
بس مترجم جاهز موب أزين;)
وإنتظر الحلقه القادمه من الأفلام بس بالبدوي:D;)

[منو]

قصة حيل روعة يا صدي السنين